Day 23

• ഈശ്വരന് രൂപമുണ്ടോ?
• നാം കാണുന്ന ഈശ്വര രൂപങ്ങൾ ഈശ്വരന്റെ രൂപങ്ങളാണോ?
• നിരാഹാരം എന്നാൽ എന്താണർത്ഥം ?
• എന്നിങ്ങനെ ഈശ്വരനെക്കുറിച്ചുള്ള ചില സുപ്രധാന അറിവുകൾ നമുക്കിന്നു സ്വന്തമാക്കാം

• രാജയോഗം, ആത്മാവും പരമാത്മാവും തമ്മിലുള്ള യോഗമാണ്. ആരെയെങ്കിലും ഓർമ്മിക്കണമെങ്കിൽ രൂപം വ്യക്തമായിരിക്കണമല്ലോ. പരമാത്മാവിനെക്കുറിച്ച് ആത്മാക്കളായ നമുക്ക് വ്യക്തമായി അറിഞ്ഞിരിക്കണം.
• ഏകാത്മാവ് എന്റെ അച്ഛനും അമ്മയുമാണ്. സർവ്വ ബന്ധുവാണ്. ശരി. പക്ഷേ രൂപം? എന്റെ പിതാവിന്റെ രൂപം എന്താണ്? നിരാകാരനാണെന്ന് പറയുന്നു. അതിനർത്ഥം രൂപമില്ലെന്നാണോ? എന്താണ് ഈശ്വരന്റെ രൂപം?
• ധ്യാനത്തിൽ ഇത് ഏറ്റവും പ്രധാനമാണ് ഈശ്വരന്റെ ഗുണങ്ങളും ശക്തികളും അറിഞ്ഞിരിക്കുക എന്നത്. നിരാകാരൻ അർത്ഥം ആകാരമില്ലാത്തവൻ എന്നാണ്. ക്ഷേത്രഗണിതത്തിൽ അളക്കാവുന്ന രൂപങ്ങൾ, രേഖ, ചതുരം, ത്രികോണം, വൃത്തം തുടങ്ങിയവയാണ്. നിരാകാരൻ ഈ പരിധികളിലൊന്നും ഒതുക്കാവുന്നതല്ല. പരിധിക്കുള്ളിലെ അളവുകൾ ദൈവത്തിന് ചേർന്നതല്ല.
• ഈശ്വരന്റെ രൂപം അറിയാൻ എളുപ്പമാണ്. നമ്മൾ നമ്മുടെ രൂപത്തെ അറിഞ്ഞാൽ മതി. ഞാൻ ആത്മാവാണ്. ജ്യോതിയാണ്. പ്രകാശമാണ്. വെളിച്ചമാണ് ചൈതന്യമാണ്. നമ്മെപ്പോലെ നമ്മുടെ മാതാപിതാവായ ഈശ്വരനും ജ്യോതിയാണ്.
• വിശ്വത്തിലെ മതങ്ങളെല്ലാം തന്നെ പരമാത്മാവിനെ ഓരോ അടയാളങ്ങൾ കൊണ്ട് ആരാധിക്കുന്നു. ഭാരതം ശിവലിംഗത്തെയാണ് ആരാധിച്ചിരുന്നത്. പ്രകാശത്തിന്റെ പ്രതീകമാണ് ജ്യോതിർലിംഗം. ദീപജ്യോതി. മഹാപ്രകാശം. പരംജ്യോതി. അതിന്റെ ഓർമ്മക്കായി സോമനാഥക്ഷേത്രം നിർമ്മിച്ചിരിക്കുന്നു. വിശ്വനാഥന്റെ ക്ഷേത്രമാണ്. വിശ്വത്തിന് മുഴുവൻ നാഥനായ, ആധാരമായ ഭഗവാൻ. ആ ഭഗവാന്റെ മക്കളാണ് നമ്മളൊക്കെ.
• മറ്റു ധർമ്മങ്ങളിലും പുണ്യാളന്മാരെ തേജോമയമായാണ് കാണുന്നത്. ദർശനങ്ങൾ അങ്ങിനെ തന്നെയാണ്. യേശുദേവനും പറഞ്ഞിട്ടുള്ളത് ദൈവം വെളിച്ചമാണ് എന്നാണ്. ഇസ്ലാം ഐതിഹ്യത്തിലും ആദം വെളുത്ത പ്രകാശഗോളം കണ്ടതായി പറയുന്നു. പിന്നെ അവിടെ ക-അബ പണിതു. പിന്നീട് അബ്രഹാമിന്റെ കാലഘട്ടത്തിൽ ഏകേശ്വരക്ഷേത്രം നിർമ്മിച്ചതായി പറയുന്നു. മക്ക പട്ടണം അതിനു ചുറ്റും വളർന്നു.
• പ്രകാശത്തിന്റെ ഓർമ്മ ചിഹ്നം സർവ്വ മതങ്ങളിലും ഉണ്ട്. അണ്ഡാകൃതിയിലുള്ള പ്രകാശഗോളത്തെ പല തരത്തിലും ചിഹ്നങ്ങളും, വിഗ്രഹങ്ങളുമായി ആരാധിച്ചിരുന്നു. എല്ലാവരും ആരാധിച്ചുവന്നത് പ്രകാശരൂപത്തെത്തന്നെയാണ്. ഗീതയിൽ പറയുന്നത്, എല്ലാ പ്രകാശങ്ങളുടെയും പ്രകാശത്തിന് ആധാരമായ പ്രകാശം എന്നാണ്. ഗായത്രീമന്ത്രം പറയുന്നു- മൂന്ന് ലോകത്തേയും പ്രകാശിപ്പിക്കുന്ന തേജസ്സ്. വേദം പറയുന്നു: അല്ലയോ അമരത്വത്തിന്റെ പുത്രന്മാരെ, ഞാൻ ആ പ്രകാശത്തെ സ്വന്തമാക്കിയിരിക്കുന്നു. അത് സ്വന്തമാക്കുമ്പോഴെ, നീയും മൃത്യുചക്രത്തില്നിന്ന് രക്ഷപ്പെടൂ… എന്ന്.
• നമുക്കും ധ്യാനം അഭ്യസിക്കാൻ ആ പരമമായ പ്രകാശത്തിലേക്ക് പോകണം. ദൈവം പ്രകാശമാണെന്ന യാഥാർഥ്യം ബോധ്യപ്പെടണം. രാജയോഗധ്യാനത്തിൽ ഇതിന് വളരെ പ്രാധാന്യമുണ്ട്. ഭഗവാന്റെ ഈ രൂപത്തിൽ ഏകാഗ്രമാകണം. സുഗന്ധത്തിന് രൂപമില്ലെങ്കിലും പൂവിന് രൂപമുണ്ട്. സൂര്യപ്രകാശവും ഇതുപോലെത്തന്നെ. ഭഗവാന്റെ ഗുണങ്ങളായ സ്നേഹവും, ശാന്തിയും, ശക്തിയും, പവിത്രതയും, ജ്ഞാനവും, സുഖവും, ആനന്ദവും ഒക്കെ വിരിഞ്ഞു വരുന്നത് പരംപൊരുളില്നിന്നാണ്.
• ധ്യാനം അഭ്യസിക്കുമ്പോൾ ആദ്യത്തെ കുറച്ചുനാൾ ദേഹത്തിൽ നിന്ന് ആത്മാവിലേക്ക് ആത്മാവിലുള്ള ആ ഏഴ് ഗുണങ്ങൾ ഒന്നൊന്നായി അനുഭവിക്കണം. പിന്നീട് സൈലൻസിലേക്ക് പോകണം. ആത്മലോകം തന്നെയാണത്. നിതാന്തവും, സമ്പൂർണ്ണവുമായ ശാന്തി സ്വധർമ്മം തന്നെ അതാണ്. ആത്മാവിന്റെ അച്ഛനായ പരമാത്മാവിനെ കാണണം. ജ്യോതിസ്വരൂപൻ ! ആത്മസ്വരൂപൻ. അതിൽ ഏകാഗ്രമാകുമ്പോൾ ബുദ്ധിക്ക് ചിത്രം കിട്ടും. അതിൽ ഏകാഗ്രമാകുമ്പോൾ അകക്കണ്ണിൽ, ആ പ്രകാശം, തേജസ്സ്, ചൈതന്യം തെളിഞ്ഞുവരും. അകത്തുള്ള അന്ധകാരം പോകും. ആന്തരികശക്തികൾ ഉണരും.
• ഞാൻ ഈശ്വരന്റെ പുത്രനാണെന്നറിയുമ്പോൾ അകത്തുള്ള ശാന്തിയും, സ്നേഹവും, ശക്തിയുമെല്ലാം പിടഞ്ഞെഴുന്നേല്ക്കും. എല്ലാം കാണുമാറാകും. ബുദ്ധിയാകുന്ന കണ്ണുകളിൽ സർവ്വേശ്വരന്റെ രൂപം തെളിഞ്ഞു തെളിഞ്ഞു വരും. കറണ്ടു പോലെ അത് ഫീൽ ചെയ്യും. ഈശ്വരനുമായി അടുപ്പം വർദ്ധിക്കും. ദിവസേന ഈ കണക്ഷൻ കിട്ടുമ്പോൾ അടുപ്പം കൂടിക്കൂടി വരും. സ്നേഹം വർദ്ധിക്കും. അതെ… അപ്പോൾ നിങ്ങൾ ഈശ്വരദർശനം സിദ്ധിച്ച ഭാഗ്യവാനായ കുട്ടിയാവുകയായി.

താഴെയുള്ള ചോദ്യങ്ങൾക്കുള്ള ഉത്തരങ്ങൾ ഒരു ഡയറിയിൽ എഴുതിവയ്ക്കുക. അഭ്യസിച്ചതിനുശേഷം എഴുതേണ്ടവ അപ്രകാരം തന്നെ ചെയ്യുക

• ഞാൻ ഇപ്പോൾ ഈശ്വരൻ്റെ സന്താനമായി തീർന്നിരിക്കുകയാണ് ഈ അവബോധം എൻറെ ഉള്ളിൽ ദിവസം ദിവസം വർദ്ധിച്ചു വരുന്നുണ്ടോ?
• പരമാത്മാവിൻ്റെ ദിവ്യ രൂപത്തെ ഉള്ളിൽ കാണാൻ കഴിയുന്നുണ്ടോ ?
• പരമാത്മാവിൻ്റെ ദിവ്യ രൂപത്തിൽ നിന്നുള്ള ശക്തിയും ശാന്തിയും എനിക്ക് പ്രാപ്തമാക്കാൻ കഴിയുന്നുണ്ടോ ?
• എൻറെ തന്നെ രൂപത്തെയും പരമാത്മാവിനെ രൂപത്തെയും എനിക്ക് സദാ കണ്ട് ആനന്ദി ക്കാൻകഴിയുന്നുണ്ടോ?